Müje haylin dizer ol gamze-i fettân saf saf


Gûyiyâ cenge turur nîze-güzârân saf saf



Seni seyr itmek içün reh-güzer-i gül-şende


İki cânibde turur serv-i hırâmân saf saf



Leşger-i eşk-i firâvân ile ceng itmek içün


Gönderür mevclerin lücce-i ummân saf saf



Gökde efgân iderek sanma geçer hayl-i küleng


Çekilür kûyına mürgân-ı dil ü cân saf saf



Câmi içre göre tâ kimlere hem-zânûsın


Şekl-i sakkâda gezer dîde-i giryân saf saf



Ehl-i dil derd ü gamun ni‘metine müstağrık


Dizilürler keremün hânına mihmân saf saf



Vasf-ı kaddünle hıram itse alem gibi kalem


Leşger-i satrı çeker defter ü dîvân saf saf



Kûyun etrâfına uşşâk dizilmiş gûyâ


Harem-i Ka‘bede her cânibe erkân saf saf



Kadrüni seng-i musallâda bilüp ey Bâkî


Turup el bağlayalar karşuna yârân saf saf